150 Joor Ueli 1876 – und was fir  e Fescht!

 

D'Ueli 1876 saage vo Härze DANGGE an alli, wo unsere Jubiläumsaaloss zue ebbis ganz Bsunderem gmacht hänn. 150 Joor – das isch kai runde Geburtsdaag, das isch e ussgwaggsene Coup-de-Charge vo dr Verainsgschicht!

 

E riisigs Danggerscheen goot an alli Konkurränte: Ihr hänn bewiise, dass Drummle au nach anderthalb Joorhundert nyt vo synere Kraft, Präzision und Lyydeschaft verloore hett. S'Niveau isch sehr hoch und d'Spannig no vyyl hööcher gsi – und unseri Oohre sinn immer no glügglig.

 

Ebesoo dangge mir unserem grossartige Publikum. Eyri Uffmerksamkait, eyre Applaus und eyri Begaischterig hänn dr Saal zem Beebe broocht – ganz im Sinn vom e würdige 150-Joor-Jubiläum.

 

E bsundere Applaus gheert unsere Jurore Rämschgi Rupp, Walti Büchler, Peter Jörg und Andy Gass. Mit gschueltem Oohr, ruhiger Hand und sicher mehr Konzentrazioon als nach 150 Joor Vereinsgeschichte nötig wär, hänn ihr fair und kompetänt bewäärtet – härzligge Dangg derfir!

 

Unser Dangg goot au an unsere Conferencier René Häfliger, wo mit guetem Witz, Charme und perfäggtem Timing duur dr Oobe gfiehrt hett – fascht so präzis wie-n-e suuber drummlete Wirbel….und das als Pfyffer….das will ebbis haisse. Dangge liebe René!

 

E grosses Danggerscheen an s'Restaurant Zic-Zac fir dä toll Saal und dr hervorragend Service. E Jubiläumsfyyr in deere Grösseoornig brucht nid nur gueti Drummler, sondern au guets Ässe und frindligi Gaschtgääber – und das hett perfäggt passt.

 

Nadyyrlig gratuliere mir au nomoll unsere erfolgryyche Dailnämende:
 

🥇 Pascal Cahenzli zem stargge Syyg,

🥈 André Rütti zem hervorragende zwaite Platz und

🥉 Luca Heitz zem stargge dritte Platz – bravo!

 

Härzliggi Gratulazioon eebefalls dr Gewinnergrubbe „Wild und kai Ahnig“ sowie em Gwinner vom Gosdymbryys, Maurice Weiss. Au ihr hänn das Jubiläum musikalisch vergoldet.

 

Fir grossartigi Unterhaltig hänn im Raameprogramm d'Operazioons-Ueli mit dr Geburt vom e glaine Ueli, d'Tres Drumigos mit virtuoser Schleegelakrobatik und Rhythmik und s'Blööser-Trio mit eme bloosene Läggerli gsoorgt. Au ihne dangge mir härzligg.

 

Mir wänn nadyyrlig au e grossee Dangg an unseri zaahlryyche Sponsoore richte. Dangg ihrer grosszüügige Unterstützig hänn mir s'Jubiläums-Bryysdrummle könne erfolgryych gstalte. Dangge.

 

150 Joor Ueli 1876 – das isch Tradizioon, Lyydeschaft, Kameradschaft und ganz vyyl Drummelhärz. Dangge, dass ihr das Jubiläum mit uns gfyyrt hänn. Mir wärde dää Oobe no lang in beschter Erinnerig bhalte – mindeschtens bis zem 200-Joor-Jubiläum 😉🥁

 

HÄRZLIGGE DANGG EYCH ALLE